الخصوصية
بياناتك
بوضوح
آخر تحديث: 19 أكتوبر 2026
باختصار: نحفظ اللي نحتاجه عشان الخدمة تشتغل بس، ما نبيع بياناتك لأحد، ما نشوف بيانات بطاقتك، وما نخزّن سجل الشات. وتقدر تحذف حسابك متى ما بغيت. هذي السياسة مكتوبة بما يتوافق مع نظام حماية البيانات الشخصية في المملكة.
1. وش نجمع
- حسابك: اسمك، وإيميلك، وكلمة المرور (لو استخدمتها) محفوظة مشفّرة بطريقة ما ترجع، وتاريخ التسجيل، وباقتك.
- قنواتك المربوطة: اسم القناة ومعرّفها في كل منصة، وصلاحيات الربط (التوكن) مشفّرة. ما نشوف كلمة مرورك في أي منصة أبداً.
- ديسكورد: لو ربطت حسابك في ديسكورد: معرّفك واسمك وصورتك، عشان نعطيك رتبة باقتك في سيرفر دلّة. ولو اشتريت بوت: معرّف السيرفر واسمه.
- المدفوعات: الباقة أو البوت، والمبلغ، والتاريخ، ورقم الفاتورة وحالتها من بوابة الدفع. بيانات البطاقة ما توصلنا أبداً — تنكتب في صفحة بوابة الدفع وهي المسؤولة عنها.
- إعدادات البوت: أوامرك ومؤقتاتك وفلاترك وإعدادات التنبيهات والنقاط، والملفات اللي ترفعها (صور وأصوات التنبيهات).
- نقاط المشاهدين: اسم المشاهد في المنصة ورصيد نقاطه في قناتك.
- التقييمات وتذاكر الدعم: نص التقييم أو التذكرة اللي تكتبها والردود عليها.
- بيانات تقنية: عنوان IP وقت الدخول ونوع المتصفح، لحماية حسابك ومنع الاحتيال، وتنحذف تلقائياً بعد فترة قصيرة.
- إحصائيات يومية مجمّعة: أعداد الرسائل والأوامر والإشراف لكل يوم، بدون محتوى الرسائل.
2. وش ما نجمع
- ما نخزّن رسائل الشات. البوت يقراها لحظة وصولها عشان يرد أو يحمي، وبعدها تروح.
- ما نحفظ بيانات بطاقتك ولا رقمها.
- ما نستخدم أدوات تتبّع إعلانية ولا نبيع بيانات لأي جهة.
3. ليش نستخدمها
- نشغّل البوت ونوصّله لقنواتك وسيرفراتك.
- نفعّل اشتراكك بعد الدفع، ونرسل لك رمز الدخول وتنبيهات الاشتراك.
- نرد على تذاكرك وطلبات الاسترجاع.
- نحمي الخدمة من السبام والاحتيال والتحايل على التجربة.
4. بوتات ديسكورد (عائلة دلّة)
لما تضيف بوت من عائلة دلّة لسيرفرك، هذا اللي يصير ببياناتك وبيانات أعضاء سيرفرك:
- وقت الشراء: معرّف السيرفر واسمه، ومعرّف حسابك في ديسكورد اللي اشتريت منه، ومدة الاشتراك. نشوف قائمة سيرفراتك اللي تقدر تديرها بس لحظة الشراء عشان تختار منها، وما نحفظها.
- إعدادات السيرفر: الرومات والرتب والأنظمة اللي فعّلتها، ورسائل الترحيب والتذاكر اللي كتبتها.
- بيانات الأعضاء داخل السيرفر: معرّف العضو في ديسكورد مع اللي يحتاجه البوت بس: المستوى ونقاط الخبرة (برو)، رصيد «دلّة كوين» (بنك)، التحذيرات (حارس وبرو)، عدد الدعوات، المشاركة في السحوبات، ونتائج الألعاب. كل هذا خاص بالسيرفر نفسه وما ينربط بين السيرفرات.
- الرسائل: بوتات الحماية والأوامر تقرا الرسائل لحظة وصولها عشان تكشف السبام والروابط وتنفّذ الأوامر، وما نخزّن محتواها. سجلات الإشراف (مثل الرسائل المحذوفة) تنرسل لروم السجلات في سيرفرك داخل ديسكورد، وما ننسخها عندنا.
- محادثات التذاكر: لما تتقفل التذكرة ينسوّى ملف نصّي فيها وينرسل لروم سجلات التذاكر في سيرفرك ولصاحب التذكرة على الخاص. ما نحتفظ بنسخة منه على سيرفراتنا.
- ما نسوّي: ما نقرا الرسائل الخاصة، وما نبيع بيانات الأعضاء، وما نستخدمها لإعلانات، وما نشاركها مع سيرفر ثاني.
صاحب السيرفر هو المسؤول عن مجتمعه، وننصحه يذكر في قوانين سيرفره إن السيرفر يستخدم بوتات دلّة.
الحذف: صاحب السيرفر يقدر يطلب حذف كل بيانات سيرفره من البوتات، وأي عضو يقدر يطلب حذف بياناته (مستواه ورصيده وتحذيراته) من سيرفر معيّن — عن طريق الدعم. وطرد البوت من السيرفر يوقفه عن جمع أي بيانات جديدة.
إضافة كروم «دلّة — بوت بث تيك توك»
الإضافة تشتغل بس على صفحات تيك توك وعلى صفحة ربط الإضافة في موقعنا، وهذا كل اللي تسويه:
- تقرا أحداث بثك: رسائل الشات والهدايا والمتابعات والمشاركات اللي توصل لصفحة بثك المباشر، وترسلها لسيرفر دلّة عشان البوت يرد عليها ويشغّل التنبيهات. ما تقرا صفحات ثانية، ولا رسائلك الخاصة، ولا سجل التصفح.
- تكتب ردود البوت: في خانة شات بثك، باسم حساب تيك توك المسجّل دخوله في متصفحك.
- رمز الربط: تحفظ رمز ربط حسابك في دلّة داخل المتصفح بس، وتمسحه لما تضغط «تسجيل خروج».
- القراءة بصوت: لو شغّلتها، المتصفح نفسه يقرا الرسائل اللي تختارها من لوحتك.
ما نبيع بيانات الإضافة ولا نستخدمها لإعلانات، ونستخدمها بس لتشغيل بوت بثك. تقدر توقفها في أي وقت بحذف الإضافة من كروم.
5. مع مين نشارك البيانات
نشارك أقل شي لازم عشان الخدمة تشتغل، مع هذي الجهات بس:
- منصات البث (تويتش، كيك، يوتيوب، تيك توك) وديسكورد: عشان البوت يقرا ويرد في قناتك وسيرفرك، بالصلاحيات اللي وافقت عليها.
- بوابة الدفع: بوابة الدفع المرخّصة. يستقبلون بيانات الدفع مباشرة منك.
- Resend: يرسل الإيميلات (رمز الدخول وتنبيهات الاشتراك).
- مايكروسوفت أو قوقل: نص الرسالة اللي تبي تنقرا بالقراءة الصوتية يروح لهم عشان يتحوّل لصوت، والصوت ينحفظ عندنا مؤقتاً.
- Hostinger: السيرفر اللي يشتغل عليه دلّة.
- الجهات الرسمية: لو طلبوها بموجب نظام.
6. الكوكيز والتخزين في المتصفح
نستخدم كوكي واحد للدخول بس. ونحفظ في متصفحك تفضيلات بسيطة، مثل القوائم المفتوحة في اللوحة وكود الإحالة لو جيت من رابط أحد.
7. كم نحتفظ فيها
- بيانات حسابك وإعداداتك: طول ما حسابك موجود.
- سجلات المدفوعات: المدة اللي تطلبها الأنظمة المالية والضريبية، حتى بعد حذف الحساب.
- سجل القنوات: عشان التجربة المجانية تكون مرة وحدة لكل قناة، نحفظ معرّف كل قناة انربطت وأول حساب ربطها وتاريخ الربط. هذا السجل يبقى حتى لو حذفت حسابك، وما نستخدمه لأي شي ثاني.
- النسخ الاحتياطية: أقصاها 14 يوم وبعدها تنحذف تلقائياً.
8. حقوقك
- الاطلاع والتصحيح: تشوف وتعدّل بياناتك من لوحتك، أو تطلب نسخة منها من الدعم.
- الحذف: من «الباقة والحساب» في لوحتك تحذف حسابك نهائياً: حسابك وإعداداتك وأوامرك وملفاتك ونقاط مشاهدينك وإحصائياتك، ما عدا سجل القنوات وسجلات المدفوعات اللي فوق.
- فصل الربط: تقدر تفصل ربط ديسكورد متى ما بغيت، وتسحب صلاحيات دلّة من إعدادات أي منصة.
9. الأمان
الاتصال كله مشفّر (HTTPS)، وصلاحيات المنصات وكلمات المرور تنحفظ مشفّرة، والدفع يتم في صفحة بوابة الدفع الآمنة. لو لاحظت شي غريب في حسابك راسلنا فوراً.
10. الأطفال
الخدمة مو موجّهة لأقل من 13 سنة، وما نجمع بياناتهم عن قصد. لو عرفنا إن حساب يخص طفل أقل من هالعمر نحذفه.
11. التعديل
لو غيّرنا شي مهم في هذي السياسة، نبلّغك على إيميلك أو في لوحتك قبلها.
12. التواصل
أي سؤال أو طلب عن بياناتك: supportdallahbot@gmail.com أو من صفحة تواصل معنا.